Berriak

https://korrika.eus/eu/

Hainbatetan atera da ikastetxean euskararen erabileraren inguruko kezka. Hortaz, euskara ikasleen artean sustatzeko aukera polita iruditu zaigu aurtengo KORRIKA ere probestea eta BIURRIKAren bigarren edizioa antolatzea.

KORRIKA Euskal Herri osoan zehar egiten den euskararen aldeko ekimen erraldoia da. Euskararen aldeko kontzientzia suspertzea eta euskaltegien eguneroko lana indartzeko dirua biltzea ditu helburu.

2024ko martxoaren 14an hasita, gelditu gabe, KORRIKAk Euskal Herria zeharkatuko du 23. aldiz. Bi mila kilometro baino gehiago euskararen alde, adin eta mota guztietako milaka partaiderekin, gau eta egun etenik gabe. 

Biurdanan ere, gure hizkuntza erabiltzen harro sentitzen garela erakutsi nahi dugu.

Helburuak:

-Ikastetxeak ardura hartzea gai honekiko.

-Ikasleak euskararen inguruan modu motibagarri batean inplikatzea.

-Ekimen kultural hunkigarri honi bultzada ematea.

Proposamena: 

KORRIKA “simulakro” bat eginen dugu martxoaren 15ean (ostirala).

Azkeneko hiru orduetan eginen da ekimena, ikasle eta irakasleak mailaka antolatuz. Ikastetxearen inguruan ibilbidetxo bat markatu eta  KORRIKA dela simulatuko dugu. 

Amaiera patioan eginen da ekitaldi batekin (estalpean). Bertan ikasleek prestaturikoak aurkeztuko dira (kanta bat, irakurketaren bat, dantza, mezuaren irakurtzea etab.). Eta bukaera bat emanen diogu pikoteo batekin.

Egitaraua: 

• 11:30ean Jostaldia bukatuta, txirrinak jo ondoren, klasera igoko dira ikasle guztiak. Laugarren orduko irakaslearekin  dagokien puntura abiatuko dira. 
• 11:45ean txupinazoa eta Biurrikaren hasiera.
• 12:15ean ikastetxera iritsi eta patioko estalpean argazki erraldoia.
• 12:30ean ekitaldia hasi. 

Harro herri, euskaraz jakin zein ez, har dezagun

dimentsio orotan eragiteko konpromisoa, herria batuta.

Harrotasunez! Konplexuak gainetik kendu,

mugi dezagun euskararen herria, ingurua mugiarazi arte.

Harro hadi Kantauri itsasoa,

Arabako mahats, Bardeako buztin.

Harro zite Pirinioetako elur, Meatzaldeko burdina.

Elkarrekin nahi ditugu pausoak egin,

espazio berriak irabazi eta, hitzez zein ekintzez,

aldarri egin.

Gauden harro garenaz, eta egiten dugunaz.

Bete ditzagun etxe eta kaleak euskaraz.

Harro plazan, online zein kanpoko bizitzan.

Harro herri, eta harro KORRIKAn!

Igande honetan emakume zientzialarien eguna ospatzen da eta gure ikastetxean ere omendu nahi izan ditugu.

Aurten 2.Batxilergokoekin Euskal Herri mailako “Kaixomundu” web sorreren lehiaketara aurkeztu gara. Oso lan txukunak egin dituzte hainbat gai ezberdin eta interesgarrien inguruan. Hona hemen kuxkuxeatzeko aukera:

• http://hobeezak.eus/ (Bideojoko ezberdinen gida bideo bitartez)
• http://mankolan.eus/ (Iruñeko mankomunitateko langile publikoen lanak eta elkarrizketak)
• http://ibilgailueneboluzioa.eus/ (Ibilgailuen eboluzioa)
• http://zineus.eus/ (Euskaraz daude pelikula eta teleasilen biltegia)
• http://osajaki.eus/  (Janari osasuntsu gomendatzen duen dieta)
• http://nafestak.eus/ (Nafarroako festak eta egutegia zehazten du)

Batxilergoko 1. mailako ekonomiako ikasleak traperos de emausen egon dira gaurkoan. Klasean ekonomia zirkularra zer den, honen eta enpresa jasangarrien garrantzia landu ondoren, traperosek Berriozarren duten egoitzara hurbildu dira. Bertan, ekonomia zirkularra bideo eta jolas baten bidez landu dute eta traperosen balioekin bat datozen bertan egiten diren jarduera desberdinak ikusi dituzte. Ekoizpen-kontsumo eredu desberdin bat posiblea da eta guk dagoeneko lehendabiziko pausuak eman ditugu. Eta zu, animatuko zara?

Gaur, Nafarroako geologiaren inguruan Fran Sanz geologien eskutik, Hitzaldi zientifikoa izan dugu Batxilergoko 1. eta 2. mailetako ikasleekin.

Pasa den ostegunean bigarren batxilergoko Ekonomia eta Administrazioko ikasleek Goienerren eskutik hitzaldi bat jaso zuten kooperatiba eta beste eredu energetiko bat ezagutuz.

Pasa den ostiralean Bartolina SIsa erakundeko 3 emakume bisitatu gintuzten: Marcia Gonzales, Eduarda Carrillo eta Salomé Mendoza. 2 hitzaldi egin zituzten, lehengoa 2.DBHko ikasleentzat eta bigarrena 1.DBHko ikasleentzat. Hitzaldi honetan, bartolinek beraien bizipeneen bidez bertako emakumeek berdintasuna eta independentzia politiko eta ekonomikoa lortzeko orain arte egin duten lana eta orain egiten ari direna kontatu ziguten. 
Bartolina Sisa erakundea Boliviako emakume nekazari indigenei laguntza eskaintzen dien erakunde bat da. Hauen helburua bertako emakumeak sufritzen duten biolentziatik aldentzea, bizitza ekonomiko-politikoan parte hartzea izatea eta haien autoestimua lantzea da. Hau, bilera eta tailer desberidinen bidez lantzen dute. 
Eduardak, Salomek eta Marciak Bartolina Sisen erakundean sartu aurretik beraien bizitza nolakoa zen kontatu ziguten, gaur egun nolakoa den, eta geratzen zaien borroka guztia. Hemengo egoerarekin alderatzeko aukera izan genuen, ikasleek egindako galdera guztiei esker. Hitzaldiaren edukia kontuan izanda, zentruko neska taldea ere gonbidatua izan zen, Bartolinen bizipenen berri izateko.
Aurtengo kurtsotik aurrera, Biurdanak Bartolinekin lan eginen du, Bakea eta solidaritate fundazioaren bitartez. Zentruko goi gaitasunak dituzten ikasleak proiektuaren motore izanen dira, eta beraiek izanen dira Bartolinen borrokaren berri emanen dietenak institutuko gainontzeko ikasleei, 1. eta 2. DBHko kurtsoetan zentratuz. 

Azaroaren 13an 3E-ko ikasleak “Matematika kale kantoian” erakusketa bisitatzera joan ziren. Bertan bineta matematikoak, umore matematikoa animazio sailetan, frogapen matematiko manipulatiboak eta teselazioak ezagutu zituzten.